Onu uzun illər öncədən - 1980-ci illərdən tanıyıram. “Laçın” rayon qəzetində işləyirdim. Rayonumuzun ən böyük kəndlərindən birinə - məşhur bayatı ustadı, haqq aşiqi Sarı Aşığın kəndinə - Güləbirdə dəfələrlə getmişdim. Öz qonaqpərvərliyi ilə, dadlı-duzlu zarafatları ilə məşhur olan bu kəndə növbəti səfərlərimin birində təsərrrüfatın aqronomu Azad kişiylə tanış oldum. Məni evlərinə qonaq apardı. Və o zamandan salamımız, münasibətimiz yarandı. Bu yaxınlarda öyrəndim ki, dostumun artıq 89 yaşı var, amma gümrahdır, sağlamdır.
Sumqayıt şəhərində yaşayan ağsaqqalı ziyarət elədim. Keçmiş günlərdən danışdıq, ötən illəri xatırladıq.
1936-cı il iyun ayının 2-də Güləbirddə anadan olmuşam. 1940-cı ildə anam rəhmətə gedib. 1942-ci ildə atamı Böyük Vətən müharibəsinə aparıblar. Dədəm məni Qubadlı rayonunun Əliquluuşağı kəndinə (anamın kəndinə) aparıb və mən onların himayəsində böyüyüb, təhsil almışam.
Ağdam Kənd Təsərrüfatı Texnikumunun tarlaçılıq şöbəsini bitirdim. 1955-ci ildə ailə qurdum, 1956-cı ildə bir oğlum oldu.
Laçın rayonunun Güləbird kəndində - Stalin kolxozunda 21 il 7 ay aqronom (baş aqronom) işlədim. Sonra sovxoz olanda mühasib köməkçisi kimi fəaliyyətə başladım. Sovxozda bir müddət kadrlar şöbəsinin müdiri işlədim.
1971-ci ildən həmkarlar təşkilatının sədri idim.
-Neçə övladınız var?
-9 uşağımız olub, biri körpə ikən rəhmətə gedib, oğlum Gəray isə Birinci Qarabağ müharibəsində şəhid olub.
Hazırda 7 -si: 3 qız, 4 oğlan yaşayır. 3 gəlinim var, 3 qızım, deməli, 6 qızım var.
11 nəvəm, 7 nəticəm var. Uşaqların, nəvə-nəticələrin hamısından razıyam, həyatımdan razıyam.
Azad kişi 1992 – 2000-ci illərdə Güləbird kənd rabitə şöbəsinin rəisi, eyni zamanda 1995 – 2012-ci illərdə Sumqayıt Şəhər 11 saylı MİS-də sahə rəisi işləyib.
Ağsaqqal Azad Məmmədov torpaqlarımızın işğaldan azad olmasının sevincini doya-doya yaşayır, ölkəmizdə, o cümlədən işğaldan azad olunmuş bölgələrimizdə gedən tikinti-abadlıq işləri ilə qürur duyur. Ona uzun ömür və möhkəm can sağlığı arzu edirik!