İsmayıl Kazımov türkologiyamızın, dilçilyiyimizin və elmi ictimaiyyətin rəğbət bəslədiyi alimlərdən biridir.
Azərbaycan dilçiliyinin görkəmli, istedadlı alimi İsmayıl Kazımov uzun illərdir bütün qüvvəsi və bacarığını dilimizin hərtərəfli tədqiqi və təbliğinə, elmi və pedaqoji kadrlar hazırlanması işinə həsr edib. O, orta məktəb müəllimliyindən , AMEA Nəsimi adına Dilçilik İnstitutunun Müasir Azərbaycan dli, Türk dilləri şöbələrinin müdiri vəzifəsinədək yüksələrək mənalı fəaliyyət yolu keçib.
İsmayıl Kazımovun yaradıcılığında türk dilləri, onun mövqeyi yeni istiqamətdə araşdırılır. “Türk dillərinin intensivlik qrammatikası” (2022), “Azərbaycan dilinin yeni sintaksisi. Mətnin akltual problemləri” (2023) əsərlərində müasir dillər əsas obyekt kimi götürülür.
İsmayıl Kazımov daim axtarışda olan çox məhsuldar və geniş fəaliyyətli alimdir. O, bu gün də linqvistik axtarışlarını davam etdirir, yeni-yeni əsərlər üzərində fəaliyyət göstərir. Onun fikrincə dilçi tədqiqatçı öz sahəsini dərindən bilməli, tədqiq etdiyi problemlərin mahiyyətini aydınlaşdırmağa cəhd göstərməlidir.
70 illik şərəfli alim ömrü yaşayan professor İsmayıl Kazımov həyat yoluna nəzər saldıqda elm sahəsində bu böyük alimin hər zaman yeni-yeni uğurlara, ilklərə imza atdığını görürük “Sadə cümlə sintaksisi” (2021), “Azərbaycan dilinin tarixi qrammatikası. Praktikum”, “Axısqa türkləri: dil, tarix və folklor” (2012) əsərləri Azərbaycan dilçiliyində yeni cığırlar açıb.
İsmayıl Kazımov elmi fəaliyyətilə bağlı respublikada, xaricdə, Türkiyədə keçirilən konfranslarda iştirak edir.
İsmayıl müəllim sözün həqiqi mənasında xeyirxah insandır. Onun geniş ürəyi, gözəl qəlbi var.
İsmayıl Kazımov bir müəllim kimi gənclərin hörmət və məhəbbətini qazanıb. Doğma dilimizin icəliklərini tələbələrə , doktorantlara öyrədir.
Professor İsmayıl Kazımov hərtərəfli tədqiqatçıdır. Dilçiliyin bütün sahələrinə aid onun sanballı əsərləri, elmi araşdırmaları dilçi mütəxəssislər üçün yaxşı mənbələrdir. Alim bütün əsərlərində dilə qayğı və həssaslıqla yanaşır.
İsmayıl Kazımov həmçinin vətənprəvər alimdir. 2023-cü ilin noyabrın 24-də işğaldan azad olunmuş Cəbrayıl rayonunun Soltanlı kəndinin təməlqoyma mərasimində iştirak edib. İsmayıl Kazımov elmiliyi qədər də, hadisələri daha dəqiq görməyi, dürüst nəticələr çıxarmağı bacaran insandır.
O, ali vətəndaşlıq mövqeyindən çıxış edə¬rək hər zaman böyük bir ruh yüksəkliyi ilə milli dövlətçiliyimizin uğurlarının təbliğ edir, ictimai-siyasi, ədəbi-mədəni proseslərə yaradıcı ziyalı kimi həssas münasibətini bildirir.
Professorun sadəliyi, səmimiliyi, elmiliyi, müsbət aurası, necə deyərlər, xeyirxahlığı onun bütövlüyündə cəmlənib vəhdət təşkil edir.
Oktyabrın 1-də filologiya elmləri doktoru, professor İsmayıl Kazımovun 70 yaşı tamam olur. Onu yubileyi münasibətilə ürəkdən təbrik edirik.
İsmayıl Kazımova möhkəm cansağlığı, yeni-yeni yaradıcılıq uğurları arzulayıram.
Təranə Şükürlü,
Filologiya üzrə fəlsəfə doktoru, dosent,
AMEA Nəsimi adına Dilçilik İnstitutunun aparıcı elmi işçisi.