GƏLƏNİ YOXDUR
Dağ başında qoca qartal tək qalıb,
Dərdi var, dərdini biləni yoxdur.
Meylini dağlara, çöllərə salıb,
Nə gedəni, nə də gələni yoxdur.
Qartal seçimində olmayıb naşı,
Özünə yurd yeri seçib Ağ daşı.
Gözləmək yeridir qayanın başı,
Yüksəlib bəzən də itir gözlərdən,
Baxır arxasınca gələni yoxdur.
Götürüb beş günlük mən də portalı,
Gedib qarış-qarış gəzəm dağları.
İstəyirəm tapam qoca qartalı,
Soruşum bəs niyə gələni yoxdur?
Yavaş-yavaş qanad açıb incəlir,
Süzdükcə səmada sanki dincəlir.
Səxavət, ayrılıq bizə güc gəlir,
Tək qalıb, qartalın gələni yoxdur.
QARABAĞ TORPAĞINDA
Gün çıxmamış yerindən
Səhərin mehlərindən
Bir nəfəs al dərindən
Qarabağ torpağında.
Nə gözəl havası var,
Armudu, heyvası var.
Dərdlərin davası var
Qarabağ torpağında.
Göy üzü bulud olar,
Hər baxan ləzzət alar.
Hərdən hava qaralar
Qarabağ torpağında.
Beşgünlük portal açın,
Xankəndi, Şuşa, Laçın,
Oynayın, gülün, qaçın
Qarabağ torpağında.
Sazlı-sözlü, aşıqlı,
Gözəl, həm yaraşıqlı
Var Qaragöl, İşıqlı
Qarabağ torpağında.
Dərdi-qəmi əksilməz,
Səxavət eldən küsməz.
Bir daha düşmən gəzməz
Qarabağ torpağında.